Govinahaadu (ಗೋವಿನಹಾಡು)

Govinahaadu

Dharani mandala madhyadolage

Mereyutiha karnata deshado

Liruva kalinganemba gollana

Pariya nanentu pelvenu

Girigaledeyali adavi naduve

Turuva doddiya madikondu

Mereva kalinganemba gollana

Siriya nanentu pelvenu

Golla doddiyoliruva hasugalu

Ella bettada mele meyuta

Hullu nolleya neera kudiyuta

Alli mereduvaranyadi

Karugalanu nenenenedu hasugalu

Korala ghante dhaniru dhanirane

Paridu langhisi chimmi negeyuta

Marali bandavu doddige

Tamma tayanu kandu karugalu

Amma endu koogi naliyuta

Summanadolu moleyanundu

Nirmaladolu idduvu

Udaya kaladoleddu gollanu

Nadiya snanava madikondu

Mudadi tilakava haneyolittu

Chadura shikeyanu hakida

Eleya mavina marada kelage

Kolananuduta gollagowdanu

Balasi ninda tarugalannu

Balige karedanu harushadi

Gange bare gouri baare

Tungabhadre tayi baare

Kamadhenu neenu baarendu

Premadali golla karedanu

Golla kareda dwaniya keli

Ella hasugalu bandu nintu

Chelli susi haalu kareyalu

Alli tumbitu bindige

                 2

Habbida male madhyadolage

Arbhutanendemba vyaghranu

Abbarisi hasi hasidu bettada 

Kibbiyolu taniddanu

Sididu roshadi moreyuta huli

Ghudughudisi bhoriduta changane

Tudukaleragida rabhasakangi

Cheduri hodavu hasugalu

Punyakoti emba govu

Tanna kandana nenedukondu

Munna halanu koduvenenuta

Chennagi ta barutire

Indenage aahara sikkitu

Endu begane dusta vyaghranu

Bandu balasi addagatti

Nindana hulirayanu

Mele biddu ninna neegale

Beelahoyvenu ninna hotteya

Seeli biduvenu enuta kopadi

Khoola vyaghranu koogalu

Ondu binnaha huliye kelu

Kandaniruvanu doddiyolage

Ondu nimishadi moleya kottu

Bandu seruvenillige

Hasida velege sikkidodaveya

Vashava madade bidalu neenu

Nusuli hoguve matte baruveya

Husiyanaduve yenditu

Satyave namma tayi tande

Satyave namma sarva balaga

Satyavakyake tappi nadedare

Mecchana paramatmanu     

                       3

Kondu tinnuvenemba hulige

Chendadinda basheyittu

Kanda ninnanu nodi hoguve

Nendu bandenu doddige

Amma neenu sayaleke

Namma tabbali madaleke

Summanilliye nillenutta

Ammanige karu helalu

Kotta bashege tappalarenu

Ketta yochane madalarenu

Nishteyindali popenallige

Kattakadegidu khandita

Aara moleyanu kudiyalamma

Aara seri badukalamma

Aara baliyali malagalamma

Aaru nanage hitavaru

Ammagalira akkagalira

Namma tayodahuttugalira

Nimma kandanendu kaniri

Tabbaliyanee karuvanu

Munde bandare hayabedi

Hinde bandare odeyabedi

Kanda nimmavanendu kaniri

Tabbaliyanee karuvanu

Kattakadeyali meyabeda

Bettadottige hogabeda

Dusta vyaghranu honchutiruvanu    

Nattanaduviru kandane

Tabbali neenade magane

Hebbuliya bayannu hoguvenu

Ibbara rhuna teeritendu

Tabbikonditu kandana

                       4

Govu karuvanu bittu bandu

Savakashava madadante

Gaviya bagila serinintu

Tavakadali huligenditu

Khandavide ko mamsavide ko

Gundigeya bisi raktavide ko

Chanda vyaghrane neenidellava

Nundu santasadindiru

Punyakotiya maatu keli

Kanna neeranu surisi nondu

Kanne yivalanu kondu tindare

Mecchana paramatmanu

Enna odahuttakka neenu

Ninna kondu naneena padevenu

Ennuta huli hari negedu

Tanna pranava bittitu.

ಗೋವಿನಹಾಡು     

ಧರಣಿ ಮಂಡಲ ಮಧ್ಯದೊಳಗೆ 

ಮೆರೆಯುತಿಹ ಕರ್ನಾಟ ದೇಶದೊ 

ಳಿರುವ ಕಾಳಿಂಗನೆಂಬ  ಗೊಲ್ಲನ 

ಪರಿಯ ನಾನೆಂತು ಪೇಳ್ವೆನು 

ಗಿರಿಗಳೆಡೆಯಲಿ ಅಡವಿ ನಡುವೆ 

ತುರುವ ದೊಡ್ಡಿಯ ಮಾಡಿಕೊಂಡು 

ಮೆರೆವ ಕಾಳಿಂಗನೆಂಬ ಗೊಲ್ಲನ 

ಸಿರಿಯ ನಾನೆಂತು ಪೇಳ್ವೆನು 

ಗೊಲ್ಲದೊಡ್ಡಿಯೊಳಿರುವ   ಹಸುಗಳು 

ಎಲ್ಲ ಬೆಟ್ಟದ ಮೇಲೆ ಮೇಯುತ 

ಹುಲ್ಲುನೊಳ್ಳೆಯ  ನೀರ ಕುಡಿಯುತ 

ಅಲ್ಲಿ ಮೆರೆದುವರಣ್ಯದಿ 

ಕರುಗಳನು ನೆನೆನೆನೆದು ಹಸುಗಳು 

ಕೊರಳ ಘಂಟೆ ಢಣಿರು ಢಣಿರನೆ 

ಪರಿದು ಲಂಘಿಸಿ ಚಿಮ್ಮಿ ನೆಗೆಯುತ 

ಮರಳಿ ಬಂದುವು ದೊಡ್ಡಿಗೆ 

ತಮ್ಮ ತಾಯನು ಕಂಡು ಕರುಗಳು 

ಅಮ್ಮಾ ಎಂದು ಕೊಗಿ ನಲಿಯುತ 

ಸುಮ್ಮಾನದೊಳು ಮೊಲೆಯನುಂಡು 

ನಿರ್ಮಲದೊಳು ಇದ್ದುವು 

ಉದಯ ಕಾಲದೊಳೆದ್ದು ಗೊಲ್ಲನು 

ನದಿಯ ಸ್ನಾನವ ಮಾಡಿಕೊಂಡು 

ಮುದದಿ ತಿಲಕವ ಹಣೆಯೊಳಿಟ್ಟು 

ಚದುರ ಶಿಖೆಯನು ಹಾಕಿದ 

ಎಳೆಯ ಮಾವಿನ ಮರದ ಕೆಳಗೆ 

ಕೊಳಲನೂದುತ  ಗೊಲ್ಲಗೌಡನು

ಬಳಸಿ ನಿಂದ ತುರುಗಳನ್ನು 

ಬಳಿಗೆ ಕರೆದನು ಹರುಷದಿ 

ಗಂಗೆ ಬಾರೇ ಗೌರಿ ಬಾರೇ 

ತುಂಗಭದ್ರೆ ತಾಯಿ ಬಾರೇ 

ಕಾಮಧೇನು ನೀನು ಬಾರೆಂದು 

ಪ್ರೇಮದಲಿ ಗೊಲ್ಲ ಕರೆದನು 

ಗೊಲ್ಲ ಕರೆದ ಧ್ವನಿಯ ಕೇಳಿ 

ಎಲ್ಲ ಹಸುಗಳು ಬಂದು ನಿಂತು 

ಚೆಲ್ಲಿ ಸೂಸಿ ಹಾಲು ಕರೆಯಲು 

ಅಲ್ಲಿ ತುಂಬಿತು ಬಿಂದಿಗೆ 

                         ೨

ಹಬ್ಬಿದಾ ಮಲೆ ಮಧ್ಯದೊಳಗೆ 

ಅರ್ಭುತನೆಂದೆಂಬ ವ್ಯಾಘ್ರನು 

ಅಬ್ಬರಿಸಿ ಹಸಿ ಹಸಿದು ಬೆಟ್ಟದ 

ಕಿಬ್ಬಿಯೊಳು ತಾನಿದ್ದನು 

ಸಿಡಿದು ರೋಷದಿ ಮೊರೆಯುತಾ ಹುಲಿ 

ಘುಡುಘುಡಿಸಿ  ಭೋರಿಡುತ ಛಂಗನೆ 

ತುಡುಕಲೆರಗಿದ ರಭಸಕಂಜಿ 

ಚದುರಿಹೋದುವು ಹಸುಗಳು 

ಪುಣ್ಯಕೋಟಿ ಎಂಬ ಗೋವು 

ತನ್ನ ಕಂದನ ನೆನೆದುಕೊಂಡು 

ಮುನ್ನ ಹಾಲನು ಕೊಡುವೆನೆನುತ 

ಚೆನ್ನಾಗಿ ತಾ ಬರುತಿರೆ 

ಇಂದೆನಗೆ ಆಹಾರ ಸಿಕ್ಕಿತು 

ಎಂದು ಬೇಗನೆ ದುಷ್ಟ ವ್ಯಾಘ್ರನು 

ಬಂದು ಬಳಸಿ ಅಡ್ಡಗಟ್ಟಿ 

ನಿಂದನಾ ಹುಲಿರಾಯನು 

ಮೇಲೆ ಬಿದ್ದು ನಿನ್ನನೀಗಲೆ 

ಬೀಳ ಹೊಯ್ವೆನು ನಿನ್ನ ಹೊಟ್ಟೆಯ 

ಸೀಳಿ ಬಿಡುವೆನು ಎನುತ ಕೋಪದಿ 

ಖೂಳ  ವ್ಯಾಘ್ರನು ಕೂಗಲು 

ಒಂದು ಬಿನ್ನಹ ಹುಲಿಯೆ ಕೇಳು 

ಕಂದನಿರುವನು ದೊಡ್ಡಿಯೊಳಗೆ 

ಒಂದು ನಿಮಿಷದಿ ಮೊಲೆಯ ಕೊಟ್ಟು 

ಬಂದು ಸೇರುವೆನಿಲ್ಲಿಗೆ 

ಹಸಿದ ವೇಳೆಗೆ ಸಿಕ್ಕಿದೊಡವೆಯ 

ವಶವ ಮಾಡದೆ ಬಿಡಲು ನೀನು 

ನುಸುಳಿ ಹೋಗುವೆ ಮತ್ತೆ ಬರುವೆಯ 

ಹುಸಿಯನಾಡುವೆಯೆಂದಿತು 

ಸತ್ಯವೇ ನಮ್ಮ ತಾಯಿ ತಂದೆ 

ಸತ್ಯವೇ ನಮ್ಮ ಸರ್ವ ಬಳಗ 

ಸತ್ಯವಾಕ್ಯಕೆ ತಪ್ಪಿ ನಡೆದರೆ  

ಮೆಚ್ಚನಾ ಪರಮಾತ್ಮನು        

                       ೩

ಕೊಂದು ತಿನ್ನುವೆನೆಂಬ ಹುಲಿಗೆ 

ಚೆಂದದಿಂದ ಭಾಷೆಯಿತ್ತು 

ಕಂದ ನಿನ್ನನು ನೋಡಿ ಹೋಗುವೆ 

ನೆಂದು ಬಂದೆನು ದೊಡ್ಡಿಗೆ 

ಅಮ್ಮ ನೀನು ಸಾಯಲೇಕೆ 

ನಮ್ಮ ತಬ್ಬಲಿ ಮಾಡಲೇಕೆ 

ಸುಮ್ಮನಿಲ್ಲಿಯೆ ನಿಲ್ಲೆನುತ್ತ 

ಅಮ್ಮನಿಗೆ ಕರು ಹೇಳಲು 

ಕೊಟ್ಟ ಭಾಷೆಗೆ ತಪ್ಪಲಾರೆನು 

ಕೆಟ್ಟ ಯೋಚನೆ ಮಾಡಲಾರೆನು 

ನಿಷ್ಠೆಯಿಂದಲಿ ಪೋಪೆನಲ್ಲಿಗೆ 

ಕಟ್ಟಕಡೆಗಿದು ಖಂಡಿತ 

ಆರ ಮೊಲೆಯನು ಕುಡಿಯಲಮ್ಮ 

ಆರ ಸೇರಿ ಬದುಕಲಮ್ಮ 

ಆರ ಬಳಿಯಲಿ ಮಲಗಲಮ್ಮ 

ಆರು ನನಗೆ ಹಿತವರು 

ಅಮ್ಮಗಳಿರ ಅಕ್ಕಗಳಿರ 

ನಮ್ಮ ತಾಯೊಡಹುಟ್ಟುಗಳಿರ 

ನಿಮ್ಮ ಕಂದನೆಂದು ಕಾಣಿರಿ 

ತಬ್ಬಲಿಯನೀ ಕರುವನು 

ಮುಂದೆ ಬಂದರೆ ಹಾಯಬೇಡಿ 

ಹಿಂದೆ ಬಂದರೆ ಒದೆಯಬೇಡಿ 

ಕಂದ ನಿಮ್ಮವನೆಂದು ಕಾಣಿರಿ 

ತಬ್ಬಲಿಯನೀ ಕರುವನು 

ಕಟ್ಟಕಡೆಯಲಿ ಮೇಯಬೇಡ 

ಬೆಟ್ಟದೊತ್ತಿಗೆ ಹೋಗಬೇಡ 

ದುಷ್ಟ ವ್ಯಾಘ್ರನು ಹೊಂಚುತಿರುವನು 

ನಟ್ಟನಡುವಿರು ಕಂದನೆ 

ತಬ್ಬಲಿ ನೀನಾದೆ ಮಗನೆ 

ಹೆಬ್ಬುಲಿಯ ಬಾಯನ್ನು ಹೋಗುವೆನು 

ಇಬ್ಬರಾ ಋಣ ತೀರಿತೆಂದು 

ತಬ್ಬಿಕೊಂಡಿತು ಕಂದನ 

                       ೪

ಗೋವು ಕರುವನು ಬಿಟ್ಟು ಬಂದು 

ಸಾವಕಾಶವ ಮಾಡದಂತೆ 

ಗವಿಯ ಬಾಗಿಲ ಸೇರಿನಿಂತು 

ತವಕದಲಿ ಹುಲಿಗೆಂದಿತು 

ಖಂಡವಿದೆ ಕೋ ಮಾಂಸವಿದೆ ಕೋ 

ಗುಂಡಿಗೆಯ ಬಿಸಿ ರಕ್ತವಿದೆ ಕೋ 

ಚಂಡ ವ್ಯಾಘ್ರನೆ ನೀನಿದೆಲ್ಲವ 

ನುಂಡು ಸಂತಸದಿಂದಿರು 

ಪುಣ್ಯಕೋಟಿಯ ಮಾತ ಕೇಳಿ 

ಕಣ್ಣನೀರನು ಸುರಿಸಿ ನೊಂದು 

ಕನ್ನೆಯಿವಳನು ಕೊಂದು ತಿಂದರೆ 

ಮೆಚ್ಚನಾ ಪರಮಾತ್ಮನು 

ಎನ್ನ ಒಡಹುಟ್ಟಕ್ಕ ನೀನು 

ನಿನ್ನ ಕೊಂದು ನಾನೇನ ಪಡೆವೆನು 

ಎನ್ನುತಾ ಹುಲಿ ಹಾರಿ ನೆಗೆದು 

ತನ್ನ ಪ್ರಾಣವ ಬಿಟ್ಟಿತು .